【on.cc 東網專訊】 藝人陳家樂近日積極健身、踩單車做「肌佬」，原來是為拍林超賢執導的英皇電影《破風》而集訓。已完成單車特訓的家樂，早前獨自現身大埔繼續練車，一身單車手造型的他又擔又踩，入型入格！從未踩過專業單車的他稱，每朝9點起練10個鐘，起初訓練更經常「炒車」見血，經連日不斷練習才克服障礙：「因為對鞋要鎖喺腳踏度，一跌就連人帶車仆落地，練習頭一、兩日都幾危險，搞到我唔夠膽盡力踩，但過咗五日都開始習慣，夠膽做比賽時嘅動作，好似邊踩邊企同烏前。」
自稱瘦底略帶水腫的家樂，直言踩足兩周後由150磅急跌至140磅，他笑謂：「嗰陣成個『乾屍』咁勁瘦！」後來，為塑造職業單車選手的鋼條身形，家樂特地跟健身教練操肌，正主力練腿部肌肉的他說：「開頭以為要練到《激戰》嘅張家輝咁，但原來踩單車唔使咁大隻，踩山路要Slim啲、鋼條啲。（要節食？）我乜都食唔使理，仲逼我食多啲飯補充能量，因為我新陳代謝好快，食乜都好快吸收同排出。」日食五、六餐的家樂透露，目前已增重到155磅，其目標則是本月內達160磅。
家樂又分享踩車的冷知識，他笑言「行規」是要剃腳毛：「我以為係擋風為快而剃，但原來係為咗踩車成日跌、有損傷，教練話貼膠布有毛撕嗰吓會好痛，加上按摩會舒服啲。」
Search